शेवग्याच्या पाल्याचे सूप:
शेवग्याचा पाला अतिशय पौष्टिक आणि आरोग्यासाठी हितकारक आहे. आपल्या आहारात त्याचा नियमित वापर करायला हवा. त्यासाठी हा प्रयोग!
साहित्य: शेवग्याचा पाला एक कप, प्रत्येकी एक टीस्पून मुगडाळ, मसुरडाळ आणि तूरडाळ, दोन टॉमेटो, दोन कांदे, पाच सहा लसूण पाकळ्या, दहा बारा मिरी, अर्धा इंच दालचिनी तुकडा, मीठ, लाल तिखट पाव टीस्पून, साखर चार टीस्पून
कृती: शेवग्याची पाने काढून स्वच्छ धुवून पाण्यात दहा मिनिटं उकळून घ्या. टॉमेटो धुवून फोडी करा. कांदे सोलून फोडी करा. लसूण सोलून घ्या. तिन्ही डाळी धुवून घ्या. शेवग्याची पाने पाणी काढून एक पातेल्यात घ्या. त्यात कांद्याच्या फोडी, टॉमेटोच्या फोडी, मिरी, दालचिनी, लसूण आणि तिन्ही डाळी पाल्यात एकत्र करा. एक कप पाणी घालून सर्व शिजवून घ्या. गार झाल्यावर वाटून गाळून घ्या. गरजेप्रमाणे पाणी घाला. मीठ, साखर तिखट घालून उकळवा. लोणी घालून गरमागरम सर्व्ह करा!
