मँगो रसमलई

 मँगो रसमलई:

साहित्य: दूध एक लीटर, आंबे चार, साखर तीन टेबलस्पून, बदाम काप, रसगुल्ले

कृती: दूध पसरट कढईत आटवत ठेवा.  बाजूची साय काढून दुधात मिक्स करत रहा पाऊण लीटर झालं की साखर घालून परत आटवत रहा. तुम्हाला हवी तेवढी दाट झाली की गॅस बंद करून गार करत ठेवा. गार झाली की फ्रीजमध्ये ठेवा. आंब्याचा रस काढून मिक्सरमध्ये फिरवून वाटून घ्या. पूर्ण गार झालेल्या बासुंदीत तयार रस मिक्स करा, तयार रसगुल्ले पाक पिळून मग बासुंदीत सोडा.  बदाम कापानी सजवा, गारेगार सर्व्ह करा.

टीप: आटवलेलं दूध पूर्ण गार झाल्याशिवाय आमरस मिक्स करू नका नाहीतर दूध फाटू शकते.

रसगुल्ले कृती माझ्या ब्लॉगवर आहे. अर्धा लीटर दुधाचे 15 ते 16 रसगुल्ले होतात.

Puran poli:

 

Puran poli:

Puran poli: 

     Puran poli is a traditional and most popular  maharashtrian sweet recipe and made during festivals like holi! Filling of Puran poli is made with skinned spilt Bengal gram( chaan dal) and jaggery/ sugar.

Ingredients:

Chana dal 1 cup

Jaggery 1 cup ( or 1/2 cup jaggery and 1/2 cup sugar)

2 cups wheat flour

Salt to taste

1/2 tea spoon cardamom powder

1/2 teaspoon nutmeg powder

Refined oil  1/2 cup

Water

Rice flour

Procedure: 

1) Wash 1 cup chana dal add  2 and 1/2 cup water. 

2)Take a pressure cooker add chana dal with water.  

3)pressure cook the  chana dal for 6/7 whistles. 

4) Keep the cooker aside til the pressure settles down. 

5) Take the wheat flour  and a pinch of salt in a large bowl. Add 1 tablespoon oil  and water little by little. 

6)Make smooth soft dough. Knead the dough until it becomes smooth. 

7) keep the dough in a bowl with adding 2 tablespoons oil for two hours.

8) Strain the excess water from dal, keep the stock aside to make 'katachi aamti( spicy dal).

9) Transfer the dal in a pan. Add 1cup jaggery,  a pinch of salt, cardamom powder, nutmeg powder. 

10) keep stirring till jaggery melts and mixture becomes thick.

11) Remove pan from the flame and grind  the mixture through puran maker or jali for fine stuffing.

12) Make a small size ball of the dough. Make  a double size ball of stuffing (puran).

13) Grease your finger tips and spread the dough like small round bowl. 

14) put stuffing ball in it and cover with dough.

15) Roll the roti by using dry rice flour.

16) Heat the tawa and place roti on it, roast both sides. 

17) Serve with ghee and coconut milk or regular milk.

मूगडाळ हलवा

 मुगडाळीचा झटपट हलवा: 

मूगडाळ भिजवून केलेला हलवा फार सुंदर होतो पण मी आत्ता सांगतेय त्या पध्दतीने झटपट होतो आणि लागतोही तसाच चविष्ट!

साहित्य: मूगडाळ 1 कप, साखर सव्वा कप, खवा अर्धा कप, तूप 1 कप, दूध दीड कप, वेलची पावडर, बदाम, काजू तुकडे, मीठ चवीला

कृती: एक कप मूगडाळ मध्यम आचेवर एकसारखी भाजून घ्या. गार झाल्यावर रवाळ दळून घ्या. कढईत  पाऊण कप तूप घाला. त्यात दळलेली मूगडाळ घालून खमंग भाजून घ्या. मूगडाळ भाजत आली की त्यात काजू बदाम तुकडे घालून दोन मिनिटं परता. आता त्यात हळूहळू दूध घालत ढवळत रहा. पाच मिनिटं मंद आचेवर झाकण ठेवून वाफ काढा. तोपर्यंत साखर मोजून घ्या, खवा गुठळी मोडून घ्या. वाफ आली की त्यात साखर, खवा, वेलची पावडर, चवीला मीठ हे सर्व घालून मिक्स करा. आता उरलेलं तूप घाला आणि परत मंद आचेवर पाच मिनिटं ठेवा. साखर पूर्ण विरघळली आणि बाजूला तूप सुटले की हलवा तयार!

टीप: साखर तुम्हाला हवी तर कमी घालू शकता पण खवा असल्याने तेवढी लागते.

भिजवलेली डाळ भाजायला लागणाऱ्या वेळेपेक्षा यासाठी खूप कमी वेळ लागतो.

तुम्हाला जास्त तूप नको असेल तर पाऊण कप पहिलं घालतो तेवढं घाला परत वरून उरलेलं घालू नका. 

✍🏻 मीनल सरदेशपांडे

दुधी हलवा

 दुधी हलवा

साहित्य: एक की दुधी भोपळा, 350 ग्रॅम खवा, एक ते सव्वा वाटी साखर, वेलची पावडर अर्धा चमचा, तूप तीन चमचे, सजावटीसाठी बदाम काप, काजूगर, बेदाणे

कृती: दुधी स्वच्छ धुवून किसून घ्यावा. कढईत तूप तापत ठेवावे. दुधीचा किस घालून तुपावर परतावा. दहा पंधरा मिनीटं परतला की त्याचा रंग बदलतो. खव्यातील गुठळी मोडून घ्यावी. परतलेल्या किसात साखर, खवा मिक्स करून पुन्हा मंद गॅसवर परतावे. साखरेमुळे मिश्रण थोडे सैल होईल . घट्टपणा आला की त्यात वेलची पावडर, काजू बदाम काप, बेदाणे मिक्स करावे. चव बघून लागल्यास साखर वाढवावी.तयार हलवा गार व्हॅनिला आईस्स्क्रीमचा गोळा घालून किंवा गरम आपल्या आवडी प्रमाणे सर्व्ह करावा.

✍🏻मिनल सरदेशपांडे

काप्या फणसाचे सांदण

काप्या फणसाचे सांदण:

 आज पहिल्यांदा आमच्या घरचा फणस पिकला..पण तोही कापा! पावसात आल्यामुळे गरे फारसे गोड नव्हते पण घरचा फणस पिकलाय तर उपयोग तर करायला हवा. बागेत दिवसरात्र मेहनत करणारे आमचे बाबा म्हणजे माझे सासरे...त्याना कापे गरे काही चावत नाहीत. त्यात आज त्यांच्या अर्धांगिनीचा वाढदिवस! म्हटलं या पेक्षा चांगला योग कुठला असणार? एक वाटी गऱ्यात अर्धी वाटी पाणी घालून मस्त रस करून घेतला आणि नेहमीप्रमाणे सांदण केलं! बाबा पण घरचे गरे खाऊ शकले आणि त्यानी मेहनत केलेल्या बागेतल्या फणसाची सांदण आईंना वाढदिवसाला करता आली...आता यापुढे केकची ती काय गोडी!

साहित्य: 15/20 काप्या फणसाचे गरे,(म्हणजे एक वाटी तयार रस) एक वाटी गूळ, सव्वा वाटी तांदळाचा रवा( इडली रवा वापरू शकता) , चिमुटभर हळद, एक वाटी पाणी, पाव वाटी ओले खोबरे, दोन चमचे साजूक तूप, 1/2 चमचा खायचा सोडा
कृती: कापे गरे सोलून घ्यावेत, एक वाटी रसाला अर्धी वाटी पाणी घालून मिक्सरला अगदी गुळगुळीत होईपर्यंत फिरवावे. पूर्वी तांदूळ धुवून वाळवून जात्यावर रवा काढला जाई. आता तयार इडली रवा मिळतो. एक चमचा तुपावर रवा भाजून घ्यावा. एक वाटी रस घेऊन त्यात एक वाटी गूळ चवीला मीठ, ओले खोबरे घालावे. चिमुटभर हळद घालावी. आता भाजलेला रवा, एक वाटी पाणी मिसळून दोन तास ठेवावे. एखाद्या पसरट डब्याला तुपाचा हात लावावा. तयार मिश्रणात एक चमचा तूप घालावे. तूप लावलेल्या डब्यात किंवा इडलीसारखे लावून 20 मिनिटे वाफवावे. तूप आणि नारळाचे दूध हवेच, सांदण खायला!
✍🏻मीनल सरदेशपांडे

आंब्याची सांज्याची पोळी/आंब्याची सांजोरी:

आंब्याची सांज्याची पोळी/आंब्याची सांजोरी:

• साहित्य:
•  १ कप( 250ml) रवा,
•  १ कप साखर,
•  १ कप पाणी,
•  १ कप ताजा आमरस,
•  १ टेबलस्पून तूप, 
• १ टीस्पून वेलची पावडर,
•  मीठ, 
• तांदूळ पिठी लाटताना लावायला
• पारीसाठी: 
• अडीच कप कणिक, 
• १टीस्पून मीठ, 
• 1/4 कप आमरस, 
• १ टेबलस्पून तेलाचे मोहन
•  पाणी
• कृती: 
• हापूस आंबे स्वच्छ धुवून रस काढून घ्या. 
• कढईत रवा घेऊन तुपावर भाजा,
•  अगदी शिऱ्यासाठी भाजतो तसा खमंग नको. 
• १ कप पाणी गरम करून घ्या. 
• साखर मोजून घ्या. 
• रवा भाजल्यावर त्यात पाणी, साखर, आमरस एकत्र करून हळूहळू मिक्स करा. 
• पाव टीस्पून मीठ घाला. 
• गुठळी होऊ देऊ नका.
•  मंद गॅसवर वाफ येऊ द्या.
  
  
  कणिक चाळून घ्या.
•  त्यात मीठ घाला.
•  तेल गरम करून घाला
• . थोडं गार झाल्यावर 1/4 कप आमरस आणि लागेल तसं पाणी घेऊन नेहमीच्या कणकेपेक्षा थोडी सैल कणिक भिजवा.
  
•  झाकून ठेवा. 
• तयार शिरा गार होऊ द्या.
•  पिठाचा आणि शिऱ्याचा सारखा गोळा घ्या. 
  
• 
  
  पुरणपोळी सारखं भरून तांदूळ पिठीवर पोळी लाटा.
  
•  तवा गरम करून थोडं तेल लावून दोन्ही बाजू खमंग भाजून घ्या. 
  
  गरमागरम पोळीचा दूध आणि तुपासोबत आस्वाद घ्या. नारळाच्या दुधासोबत मस्त लागते.
  
  
  ✍🏻मिनल सरदेशपांडे
• 
  

खपली गव्हाचे गुलगुले

खपली गव्हाचे गुलगुले:

 रेसीपी नेमकी कोणत्या भागातली आहे ते नाही माहीत पण कॉलेजमध्ये असताना एका मैत्रिणीकडे खाल्ले होते ती चव स्वस्थ बसू नेत नव्हती. आज केला प्रयत्न, आणि काय सांगू परफेक्ट चव जमलीय अहाहा!!

साहित्य:
अर्धा कप गूळ, अर्धा कप पाणी, एक कप कणिक(मी खपली गव्हाची वापरली), दोन टीस्पून रवा, एक टीस्पून सुंठ पावडर, अर्धा टीस्पून मीठ, पाव टीस्पून वेलची पावडर, पाव टीस्पून जायफळ पावडर,  पाव कप ओलं खोबरं,  अर्धा टीस्पून खायचा सोडा, तेल तळणीसाठी

कृती:
  अर्धा कप  बारीक चिरलेला गूळ आणि अर्धा कप पाणी एकत्र करा
. त्यात मीठ, सुंठ पावडर, खोबरं घाला.
गूळ पूर्ण विरघळला की त्यात कणिक, रवा मिसळा.
मिश्रण चार पाच तास झाकून ठेवा.

 करायला घेताना त्यात वेलची पावडर, जायफळ पावडर, खायचा सोडा घालून मिश्रण फेटा.
कढईत तेल तापत ठेवा.
तेल तापलं की गॅस बारीक करून छोटे छोटे गोळे सोडा.

 मध्यम गॅस करून बदामी रंगावर तळा.
मस्त  हलके गुलगुले तयार आहेत!

भाजणीचे वडे:

भाजणीचे वडे: कोकणात बऱ्याच ठिकाणी होळीला भाजणीचे वडे करायची पध्द्त आहे.

साहित्य:
भाजणीसाठी: 
एक की तांदूळ, अर्धी की चणाडाळ, पाव की उडीद, पाव की जोंधळे, एक वाटी पोहे, एक वाटी साबुदाणा, एक वाटी धने, अर्धी वाटी जीरे

वड्यांसाठी: एक कप भाजणी, दोन टीस्पून तेल, मीठ, एक टीस्पून लाल तिखट, पाव टीस्पून हळद, पाव टीस्पून ओवा, तेल तळणीसाठी, पाणी

कृती: भाजणीसाठी सांगितलेलं सर्व साहित्य वेगवेगळे भाजून घ्या. एकत्र करून थोडं सरसरीत दळून आणा. तयार भाजणी एक कप(250ml) घ्या. त्यात तिखट, मीठ, ओवा, तेल मिक्स करा. पाऊण कप पाणी गरम करा. तयार पिठावर घालून उलथ्याने मिक्स करा. थोडं गार झालं की पीठ मळून घ्या, लागलं तर थोडं गार पाणी घ्या. छोटे गोळे करून घ्या. केळीच्या पानावर किंवा जाड प्लॅस्टिक पिशवीवर थापा.

आवडत असेल तर मध्ये भोक पाडा. कढईत तेल गरम करून वडे तळून घ्या.

फोडणीची मिरची, दही, लोणी आणि वडे... अहाहा!

टीप: काही जण भाजणीत हरभरे घालतात पण त्यामुळे वडे खाल्ल्यावर जळजळ होते म्हणून मी चणाडाळ वापरते. तुम्ही डाळ आणि हरभरे निम्मे निम्मे घेऊ शकता.
भाजणी भाजताना अति लालसर भाजू नका त्यामुळे ही खाताना जळजळ होते.
तेल किंवा पाणी यातील काही तरी एकच गरम घाला...शक्यतो पाणीच! दोन्ही गरम घातल्यास वडे तेलकट होतात.

खपली गव्हाची खीर:

खपली गव्हाची खीर:

खपली गहू एक वाटी, गूळ एक वाटी, ओलं खोबरं एक वाटी, काजूगर, बदाम काप, जायफळ पावडर पाव टीस्पून, वेलची पावडर पाव टीस्पून, तूप दोन टीस्पून, नारळाचं दूध दोन वाट्या

कृती: 
गव्हाला टरफल असेल तर पाण्याचा हात लावून फडक्यावर चोळून पाखडून घ्या. तासभर गहू भिजत घाला. तासाभराने बाहेर काढून कापडावर पसरून ठेवा, ओलसरपणा जाऊ द्या. भिजलेले गहू मिक्सरला भरडसर वाटून घ्या.

तिप्पट पाणी घालून कुकरमध्ये घालून गहू शिजवून घ्या. कढईत तूप घालून मंद गॅसवर ठेवा. त्यात काजूचे तुकडे, बदाम काप परतून बाजूला ठेवा. शिजलेले गहू तुपात घालून परता. त्यात गूळ, खोबरं घालून शिजू द्या. अगदी थोडं पाणी घाला. जायफळ पावडर, वेलची पावडर घाला. परतलेले काप घालून सजवा. नारळाचं दूध काढून ठेवा. जेवताना आवडीप्रमाणे नारळाचं दूध घालून फस्त करा... मस्त खमंग लागते

सफरचंदाची पोळी:

सफरचंदाची पोळी:

बऱ्याच वेळा पेशन्ट ला बघायला जाताना लोकं फळं घेऊन जातात. खूप सारी फळं आली की एखादा प्रयोगशील पेशन्ट असं काहीतरी करतो!
साहित्य: सफरचंदाचा किस एक वाटी, साखर पाऊण वाटी, दूध अर्धी वाटी, दूध पावडर 40 ग्रॅम( 10 रु ची दोन पाकिटं), वेलची पावडर, तूप एक चमचा

पारीसाठी: एक वाटी कणिक, एक चमचा बेसन, दीड चमचा तांदूळ पिठी, मीठ, दीड चमचा तेल
कृती: कणकेत तांदूळ पिठी, बेसन, मीठ आणि तेल घालून नेहमीच्या पोळ्यांसारखी भिजवा. झाकून ठेवा. सफरचंदाची सालं काढून किसून घ्या. कढईत तूप घाला. त्यात किसलेलं सफरचंद घालून दोन मिनिटं परता. आता त्यात दूध, साखर घाला. ढवळत रहा.

घट्ट होऊ लागलं की दूध पावडर आणि वेलची पावडर घाला. घट्ट होऊ लागलं की गॅस बंद करून गार करत ठेवा.खूप घट्ट झालं तर वड्या पडतील.. थोडं मऊ असू द्या.

तरी घट्ट वाटलं तर दुधाच्या हाताने मळून घ्या. कणकेचा छोटा गोळा घ्या. त्याची वाटी करून कणके पेक्षा थोडा छोटा गोळा त्यात भरून उंडा तयार करा.कणकेवर लाटा. तव्यावर दोन्ही बाजूने भाजून घ्यासाजूक तुपासोबत फस्त करा...अगदी खव्याच्या पोळी सारखी लागते.

टीप: 1)पोळी कातण्याने कातली तर दोन कारणं असतात एक तर कणिक आणि सारण सारखं पसरलं नाही.
2)दुसरं म्हणजे छान दिसावं म्हणून!
3) माझी आई साखर विरघळली की त्यातच कणिक घालून भिजवते आणि त्याची पोळी करते, भरत नाही.
4) पोळ्या करायच्या नसतील तर सारण अजून थोडं घट्ट करा आणि वड्या थापा!
एका वाटीत आठ पोळ्या झाल्या.

मखाणे खीर

मखाणे खीर:

मखाणे म्हणजे कमळाच्या बियांच्या लाह्या...असं मी ऐकलंय.. ह्या खूप पौष्टिक असतात.
साहित्य: मखाणे तीन वाट्या, दूध तीन ली, साखर पाऊण वाटी, अर्धा टीस्पून वेलची पावडर, अर्धा टीस्पून जायफळ पावडर, बदाम काप, केशर काड्या, तूप
कृती: मखाणे चमचाभर  तुपावर परतून घ्या. त्यातले छोटे थोडे तसेच घालायला बाजूला ठेवा.  बाकीचे मिक्सरला फिरवून घ्या. कढईत दूध आटवत ठेवा. साखर आटवताना घाला. दोन लिटर झालं की त्यात मखाणे पावडर, अख्खे मखाणे, वेलची, दुधात खलून केशर, जायफळ सर्व घाला. उकळू द्या. बदाम काप आणि जे ड्रायफ्रूटस् हवे असतील ते घाला. चव बघून लागली तर साखर घाला. गार करून किंवा गरम आवडीप्रमाणे सर्व्ह करा.

✍🏻मिनल सरदेशपांडे

गूळ पोळी

नवीन वर्षात येणारा पहिला सण संक्रांत... गोडवा आणणारा म्हणून हीच रेसीपी शेअर करतेय जीवनातल्या गोडव्याला सुरुवात करताना!

साहित्य: गूळ दोन वाट्या, तीळ अर्धी वाटी, खसखस पाव वाटी, सुकं खोबरं पाव वाटी, दाण्याचं कूट पाव वाटी, बेसन अर्धी वाटी, तीन चमचे तेल

पारी साठी: दीड वाटी कणिक, सव्वा वाटी मैदा,  पाव वाटी बेसन,एक टेबलस्पून तेल, मीठ, पाणी
लाटण्यासाठी तांदूळ पिठी
कृती: तीळ, खसखस, खोबरं किसून सगळं वेगवेगळे भाजून घ्या. मिक्सरला फिरवून घ्या. भाजलेल्या दाण्याचं कूट मिसळा. बेसन तीन चमचे तेल घालून खमंग भाजा. गूळ बारीक किसून घ्या. बेसन आणि भाजलेले सर्व साहित्य गुळात मिसळा.
कणिक आणि मैदा, बेसन थोडं मीठ एकत्र करा. एक टेबलस्पून तेल तापवून त्यावर घाला. घट्ट पीठ मळा. अर्धा तास ठेवा.

सारण कोरडं वाटत असेल तर दुधाचा हात लावून मळून घ्या. जेवढं पीठ तेवढं सारण घेऊन त्याची गोळी पारीच्या वाटीत भरून तांदळाच्या पिठीवर लाटा

. मध्यम गॅसवर भाजा. साजूक तुपाबरोबर फस्त करा.

टीप:  पोळ्या चिकटू नयेत म्हणून  एक टीप... पोळी टाकताना गूळ दिसत असेल अशी बाजू वर आणि एकसंध पिठाची बाजू खाली ठेवायची तव्यावर, उलटण्या आधी जिथे फुटलीय नक्की चिकटणार असं वाटतंय तिथे तेल सोडून मग परतायची किंवा परतल्यावर बाजूने तेल सोडायचं थोडं यामुळे तव्याला चिकटत नाही☺️ पुढच्या वेळी करून बघा.  

एक नॅपकिन ठेवा जवळ पोळी झाली की लगेच तवा पुसून घ्या, किंचित गूळ बाहेर आला असेल तर पटकन निघतो आणि पुढची पोळी चिकटत नाही.

संत्रा भात

संत्रा भात:

या सीझनला मिळणारी संत्री खूप दिवस खुणावत होती. आज करण्याचा योग आला.
साहित्य: एक वाटी तांदूळ, एक वाटी साखर , एक वाटी पाणी, दोन वाट्या संत्र्याचा रस( साधारणपणे चार संत्र्याचा), मीठ, तूप दोन चमचे, चार लवंगा, काजूगर दहा बारा, बदाम काप, बेदाणे, केशर सिरप( ऐच्छिक) एक चमचा. संत्र्याच्या फोडी आणि साल सजावटी साठी, वेलची पावडर अर्धा टीस्पून

कृती: संत्री सोलून घ्या. बिया बाजूला करून रस काढा. एका संत्र्याच्या फोडी सोलून सजावटीसाठी ठेवा. रस गाळून घ्या. तांदूळ धुवून निथळत ठेवा. कढईत तूप घाला. त्यात लवंगा घाला, परतून झालं की तांदूळ घाला. परतून घ्या. कुकरच्या डब्यात तांदूळ काढून त्यात एक वाटी पाणी आणि एक वाटी संत्र्याचा रस घालून कुकरमध्ये ठेवून शिजवून घ्या.  भात गार होऊ द्या. काजूगर गरम पाण्यात ठेवा.  बदाम काप करा. बेदाणे स्वच्छ करून घ्या.कढईत साखर आणि एक वाटी संत्र्याचा रस एकत्र करा. चवीपुरते मीठ घाला. गॅसवर ठेवून साखर विरघळू द्या. गॅस बारीक ठेवा. काजूगर, बदाम काप, बेदाणे घाला. वेलची पावडर घाला. केशर सिरप घाला. शिजलेला भात मिक्स करा. मंद गॅसवर झाकण ठेवून वाफ येऊ द्या. दहा मिनिटांनी गॅस बंद करा. सर्व्ह करताना ताज्या संत्र्याच्या फोडीनी सजवून सर्व्ह करा.

✍🏻 मिनल सरदेशपांडे

प्रसादाचा शिरा:

प्रसादाचा शिरा: 

          काही काही पदार्थ पाहिले तरी ते करणारं माणूस आधी समोर येतं... तसा हा प्रसादाचा शिरा! लग्नाआधी पूजेसाठी करताना आमच्या घरी सोवळ्यात करायचा आणि तोही नऊवारी नेसून त्यामुळे मी त्या प्रांतात गेलेच नाही.
       लग्न झाल्यावर पूजेचा प्रसाद करणं हा एक सोहळा असतो हे मी सासुबाईंची तयारी पाहून अनुभवलं. त्याची तयारी त्या आदल्या दिवशीच करतात. सव्वा किलो रवा मोजून घ्यायचा, तो मंद आचेवर तांबूस भाजायचा. बेदाणे काड्या काढून ठेवायचे. काजूगर सोलून पाकळ्या करून ठेवायच्या. बदाम काप करून ठेवायचे. सव्वा की साखर, सव्वा की साजूक तूप वेगवेगळ्या डब्यात मोजून तयार ठेवायचं. सकाळी आंघोळ करून आल्यावर खाली शेगडी घेऊन त्यावर भली मोठी कढई ठेवायची... बसायला तसाच ऐसपैस चौरंग! रव्याच्या तिप्पट दूध पाणी घ्यायचं. दूध तापवून झालं की दोन भाग साय न काढता दूध आणि एक भाग पाणी एका बाजूला गरम करायचं. दुसऱ्या बाजूला कढईत सगळं तूप घेऊन त्यात भाजलेला रवा परत परतायला ठेवायचा. सव्वा केळं काप करून या रव्यावर तुपात तळायचे. बेदाणे पाण्यात धुवून तेही तुपात घालायचे. काजूगर, बदाम काप सगळेच पाठोपाठ तुपात पोहायला लागायचे. आता त्यात चिमूटभर मीठ घालायचं. आणि गॅस मंद ठेवून तयार दूध पाणी सावकाश ओतायचं.. हे करताना रवा फसफसू लागतो... अंगावर उडू शकतो. आता साखर मिसळायची. वेलची पावडर सढळहस्ते मिसळून नीट खालपासून हलवायचा, दुधात खलून केशर काड्या शिऱ्यात मिसळायच्या. आता झाकण ठेवून एक वाफ काढायची आणि झाकण काढून तूप सुटेपर्यंत मंद गॅसवर परतत रहायचं! 
       असा काही मस्त सुगंध पसरतो घरभर...अहाहा! हे सगळं त्या इतकं तन्मयतेने करत असतात की ती गोडी शिऱ्यात उतरतेच!
अजूनही मी कितीही पदार्थ बनवत असले तरीही प्रसादाचा शिरा मी केलेला नाही. वयाच्या ७४व्या वर्षीही तितक्याच उत्साहाने त्या प्रसाद करतात. आज नवरात्रातल्या नैवेद्यासाठी त्यांची कॉपी करायचा मी केलेला छोटासा प्रयत्न... तूप जरा कमीच झालंय माझं... कोकणस्थीपणा आडवा येतो दुसरं काय?😊