चिकू कलाकंद:
चांगला लागतो. आमच्या बाबांनी घराजवळ दोन चिकुची कलमं लावलीत. त्यामुळे भरपूर होतात.
यावेळी घरात खाणारी मंडळी कमी होती देऊन घेऊन सुध्दा एकदम बरेच तयार झाले.
साहित्य: दीड वाटी चिकुचा गर, एक वाटी पनीर, एक वाटी खवा, एक वाटी साखर, वेलची पावडर, काजू, बदाम काप सजावटीसाठी.
कृती: चिकूची साल आणि बी काढून फोडी मोजून कढईत घ्या. हाताने किंचित कुस्करून घ्या अगदी गुळगुळीत नको. तुकडे रहायला हवेत.
खवा, पनीर दोन्हीही मोकळं करून घ्या. चिकू मध्ये पनीर, खवा आणि साखर घालून सगळं मिश्रण नीट मिक्स करा. मंद आचेवर ढवळत रहा. फार सैल होत नाही.
१५ मिनिटात गोळा व्हायला लागतो. वेलची पावडर घालून तूप लावलेल्या ताटात थापा. वरून काप लावून मार्किंग करून ठेवा.
गार झाल्यावर बर्फी कापून अलगद डब्यात ठेवा.
अतिशय सुंदर चिकुची चव येते.
टीप: साखर सम्राट मुळात चिकू चालणार नाही त्यामुळे हे एखादं खायला चालेल.
चिकू गोड असतो तरीही साखर का तर पनीर आणि खवा याच्या निम्मे इतकीच साखर आहे ती तेवढी लागतेच नाहीतर वडी पडणार नाही.
अजून कमी हवी तर पाऊण वाटी घ्या एक न घेता. पण मी दिलेल्या प्रमाणात गोड गोड होत नाही.
कलाकंद एकदम वडीसारखा नसतोच त्यामुळे खूप वेळ ठेवून घट्ट नका करू.
हे गावठी चिकू किंचित रवाळ असतात त्याने अजून मजा येते
✍️मीनल सरदेशपांडे
कोणत्याही टिप्पण्या नाहीत:
टिप्पणी पोस्ट करा