मुगडाळ पीठ गुळपापडी:
#पारंपरिक
#पौष्टिक
साहित्य: एक वाटी पातळ तूप, एक वाटी बारीक चिरून गूळ, दोन वाट्या मुगडाळ पीठ, अर्धी वाटी सुकं खोबरं, चार चमचे पोहे, अर्धा टीस्पून जायफळ पावडर, दोन टीस्पून सुंठ पावडर, काजू किंवा बदाम काप,
कृती: मी मुगडाळ छान तांबूस भाजून रवाळ दळून घेतली होती. खोबरं भाजून बाजूला ठेवा. कढईत एक वाटी तूप घ्या. व्यवस्थित गरम झालं की त्यात पोहे तळून घ्या. ते बाजूला ठेवा( इथे तुम्ही dryfruits तुकडे पण घेऊ शकता किंवा डिंक पण चालेल, मला कुरकुरीत पोहे आवडतात.)
आता त्याच तुपात मुगडाळ पीठ घालून पाच मिनिटं भाजून घ्या.
मुळात भाजलेलं असल्याने फार वेळ लागत नाही. हे भाजत असताना ताटाला तूप लावून घ्या. भाजलेल्या पिठात जायफळ पावडर, सुंठ पावडर मिक्स करा. खोबरं आणि तळलेले पोहे घाला. गॅस बंद करा. बारीक चिरलेला गूळ मिश्रणात घालून पटापट ढवळत नीट मिक्स करा. गूळ बारीक चिरला
की खडे तसेच राहत नाहीत.
मिश्रण तूप लावलेल्या ताटात काढून वाटीच्या तळाला तूप लावून सारखं करा. काजू किंवा बदाम काप किंवा खोबरं किसाने सजवा.(ऐच्छिक)
टीप: याच प्रमाणात कुळीथ पीठ पापडी पण छान होते. कुळीथ पिठी मिळते त्याची पण होते आणि झटपट...
मुगडाळ किंवा कुळीथ दोन्हीही उग्र असल्याने त्याला गूळ यापेक्षा कमी चालत नाही.
✍️ मीनल सरदेशपांडे
कोणत्याही टिप्पण्या नाहीत:
टिप्पणी पोस्ट करा