धिरड्याचे पौष्टिक सँडविच:

पौष्टिक सँडविच: फ्युजन रेसीपी:

साहित्य: धिरड्याचे मिश्र पीठ एक वाटी, मेथी धुवून चिरून शिजवून पाव वाटी, तिखट एक चमचा, हळद पाव चमचा, मीठ,चाट मसाला घरचे  तूप

सॅंडविच साठी: घरचा किंवा कोणत्याही कंपनीचा टोमॅटो सॉस, एक बीट वाफवून, एक कांदा स्लाईस, मुळ्याच्या स्लाईस, कोथिंबीर बारीक चिरून, मिरची बारीक तुकडे, लोणी घरचं किंवा बटर, चीज
कृती: मिश्र पिठात शिजलेली मेथी तिखट, मीठ, हळद घालून तुपावर चौकोनी आकारात धिरडी घाला.

दोन्ही बाजू भाजून घ्या. बीट वाफवून सोलून स्लाईस करा. एका धिरड्याला सॉस लावा. दुसऱ्या धिरड्याला घरचे लोणी थोडं मीठ मिसळून लावा. सॉस लावलेल्या धिरड्यावर कांदा बीट आणि मुळ्याचे स्लाइस लावा.

त्यावर कोथिंबीर, मिरचीचे तुकडे घाला. थोडा चाट मसाला भुरभुरा.

आता त्यावर चीज किसा. दुसरा पीस वर ठेवा.

तव्यावर मंद गॅसवर दोन्ही बाजू भाजा. वरून थोडे चीज किसून सॉस बरोबर सर्व्ह करा.
✍🏻 मिनल सरदेशपांडे

मेथी कांदा गोळा भाजी

मेथीकांदा भाजणी पेरून भाजी:

साहित्य: मेथी चिरून एक वाटी, दोन कांदे, भाजणी दोन टेबलस्पून, कांदा लसूण मसाला किंवा लाल तिखट एक टीस्पून, मीठ, हळद पाव टीस्पून, तेल दोन टेबलस्पून, मोहोरी पाव टीस्पून
कृती: मेथी निवडून स्वच्छ धुवा. बारीक चिरा. कांदे चिरून घ्या. कढईत तेल तापवा. त्यात मोहोरी घाला. ती तडतडली की कांदा घालून परता. मऊ झाला की हळद आणि तिखट घाला. परता. मेथी घालून परता. त्यावर अर्धी वाटी पाणी घालून झाकण ठेवा. मंद गॅसवर मेथी शिजू द्या. पाच मिनिटांत झाकण काढा. चवीनुसार मीठ घाला. भाजणी पेरून भाजी ढवळा आणि झाकण ठेवून छान वाफ येऊ द्या. गरमागरम भाजी आणि भाकरी म्हणजे अहाहा!!!!
टीप: यात भाजणी ऐवजी बेसन वापरू शकता. पण भाजणीचा खमंगपणा येतो.
साखर हवी असल्यास घाला.

✍🏻 मिनल सरदेशपांडे

तुरीच्या ओल्या दाण्यांची उसळ

तुरीच्या ओल्या दाण्यांची उसळ:

या सीझनला हिरव्या भाज्यांची रेलचेल असते. मटार, मुळा, तूर अशा शेंगा खूप येतात. ज्या ऋतूत भाजी मिळते ती त्या ऋतूत अवश्य खावी.
ही घ्या मग सोप्पी रेसीपी😊
साहित्य: पाव की तुरीच्या शेंगा( एक वाटी दाणे), एक टेबलस्पून ओलं खोबरं, एक टेबलस्पून चिरलेली कोथिंबीर, दोन ओल्या मिरच्या, दोन पाकळ्या लसूण, अर्धा चमचा कांदा लसूण मसाला, पाव चमचा हळद, तेल एक टेबलस्पून, मोहोरी पाव टीस्पून, कोथिंबीर वरून सजवायला, मीठ
कृती: तुरीच्या शेंगा सोलून घ्या. दाणे मीठ आणि पाणी घालून शिजवून घ्या. खोबरं, कोथिंबीर, मिरचीचे तुकडे, सोललेली लसूण एकत्र करा. हे सर्व मिक्सरमध्ये बारीक वाटा. तेलाची मोहोरी, हळद घालून फोडणी करा. त्यात तुरीचे दाणे घाला. आता वाटप मिसळा. चवीनुसार मीठ घाला. आधी दाण्यांमध्ये मीठ घातलंय हे लक्षात ठेवा. कांदा लसूण मसाला घाला. उकळी काढा.

गरमागरम पोळी सोबत सर्व्ह करा.
✍🏻 मिनल सरदेशपांडे

उपिठाचे कटलेट

उरलेल्या उपिठाचे कटलेट:

भरपूर माणसांच्या जेवणाची सवय असली की दोन माणसांचा अंदाज कसा येणार? मग काय होतं जास्त... जास्त झालं तर त्यातून काहीतरी आवडीचं केलं तर संपणार! बघा कृती...कदाचित यासाठी उपीठ/ उपमा/ सांजा मुद्दाम उरवाल😊

साहित्य: दोन वाट्या उरलेलं उपीठ, एक मध्यम बटाटा, तीन लसूण पाकळ्या, छोटा तुकडा आलं, एक चमचा तिखट, पाव चमचा हळद, कोथिंबीर, मीठ, तेल
कृती: बटाटा शिजवून घ्या. आलं लसूण पेस्ट करा. एका थाळ्यात उपीठ घ्या. त्यात कुस्करून बटाटा, तिखट, मीठ( हे बटाट्या पुरतं घाला, उपिठात सगळं आहेच), हळद, बारीक चिरून कोथिंबीर घाला. छान मळून घ्या. आता छोटे गोळे करून त्याला कटलेटचा आकार द्या.

तव्यावर तेल सोडून शॅलो फ्राय करा. सॉस बरोबर किंवा चटणीबरोबर सर्व्ह करा.

टीप: १)लहान मुलं घरात असतील तर कटलेटच्या मध्ये  तयार करताना छोटा चिजचा तुकडा ठेवा.
२) मी उपिठात शेंगदाणे घातले होते ते कटलेट मध्ये मधेच छान लागत होते.

नारळाच्या दुधातील खरवस

नारळाच्या दुधातील खरवस बनवण्यासाठी साहित्य ( Ingredients to make KHARVAS Recipe in Marathi )

• पहिल्या दिवसाचा चीक एक वाटी
• नारळाचं दूध सव्वा वाटी
• गूळ पाऊण वाटी
• जायफळ पावडर पाव टीस्पून
• केशर काड्या
• न वाट्या ओलं खोबरं मिक्सरला पाणी घालून फिरवा
• गाळण्याने दूध गाळून घ्या.
• एक वाटी चिकात सव्वा वाटी दूध मिसळा.
• गूळ बारीक चिरून घ्या.
• आधी अर्धी वाटी मिसळून चव बघा.
• गोड पुढे लागेल असा गूळ हवा.
• लागला तर अजून घाला.
• एका डब्यात मिश्रण ओता.
• जायफळ पावडर केशर काड्या घाला.
• कुकरमध्ये खाली पाणी घालून प्लेट ठेवा.
• डबा झाकण लावून ठेवा.
• शिट्टी काढून 15 मिनिटं वाफवा.
• गार किंवा गरम सर्व्ह करा.
• 
  

आल्याचा गुळाम्बा

आल्याचा गुळाम्बा:

थंडी सुरू झाली आल्याच्या वड्या आठवतात. प्रत्येक ऋतूत प्रत्येक प्रदेशात काही वेगळं केलं जातं.
आता हा गुळाम्बा पहा, झटपट होतो आणि टिकतोही!
साहित्य: आलं आणि गूळ
कृती: आलं स्वच्छ धुवून घ्या. त्याची सालं काढून किसणीवर किसून घ्या. शक्यतो किसूनच घ्या म्हणजे त्यातले दोर किसणीवर राहतात ते फ्रीजमध्ये ठेवा आणि चहात वापरा.
आल्याचा कीस वाटीने मोजा. एक वाटीला दीड वाटी या प्रमाणात बारीक चिरलेला गूळ मिक्स करा. अर्धा तास तसंच ठेवा. आल्याला पाणी सुटेल. आता पातेलं गॅसवर ठेवून द्या. उकळू द्या. गूळ विरघळला की थेंब डिशमध्ये टाकून पसरत नाही ना पहा. आता उतरून गार झाला की काचेच्या बरणीत भरून ठेवा. थंडीत चमच्याने घेऊन खाऊ शकता.
आल्याच्या तिखटपणावर गूळ कमी जास्त करा.

पाडवा स्पेशल... दिव्यांची मिठाई

साहित्य:

 एक वाटी काजूगर, अर्धी वाटी साखर, दोन टीस्पून कोको पावडर, वातींसाठी अर्धी वाटी काजूगर, पाव वाटी साखर केशरी रंग, दिव्यातील तूप म्हणून व्हाईट चॉकलेट कंपाउंड, थोडं दूध, सिल्व्हर बॉल्स

कृती:
 दिव्यासाठी च्या काजूची पावडर करा. त्यात कोको पावडर मिसळून घ्या.कढईत अर्धी वाटी साखर घ्या. त्यात पाव वाटी पाणी घाला. साखर विरघळू द्या. आता त्यात तयार काजू पावडर मिसळून ढवळत रहा. घट्ट होऊ लागलं की खाली उतरून घोटत रहा. गोळा झाला की ताटात काढून मळा. छोटा गोळा घेऊन दिव्याचा आकार द्या. सगळे दिवे करून घ्या.

आता वाती साठी काजू पावडर करा. अगदी तजोड खायचा रंग किंवा केशर सिरप घ्या. कढईत पाव वाटी साखर घ्या.थोडं पाणी घाला. साखर विरघळली की त्यात तयार पावडर आणि रंग मिसळा. दोन मिनिटं ढवळून खाली उतरवा. घटून गोळा करा. वाती तयार करून घ्या. आता एका मोठ्या पातेल्यात पाणी उकळवा. दुसऱ्या छोट्या भांड्यात व्हाईट चॉकलेट कंपाऊंडचे तुकडे घ्या. अगदी थोडं दूध घाला. उकळत्या पाण्यात भांडं धरून चॉकलेट वितळवून घ्या. डबल बॉयलर पद्धतीने! आता तयार दिव्यात पटापट चॉकलेट घाला. जरा घट्ट झालं की तयार वाती उभ्या करा.

मस्त वेगळी दिवाळी स्पेशल मिठाई तयार आहे!