चिंचगुळातली तोंडल्याची रसभाजी

साहित्य:अर्धा की तोंडली, दोन टेबलस्पून तेल, पाव टीस्पून मोहोरी, पाव टीस्पून जीरं, हिंग पाव टीस्पून, हळद अर्धा टीस्पून, एक टीस्पून गोडा मसाला, एक टीस्पून कांदा लसूण मसाला, एक टेबलस्पून गूळ, एक टेबलस्पून चिंचेचा कोळ, लाल तिखट एक टीस्पून, ओलं खोबरं दोन टेबलस्पून, शेंगदाणे कूट दोन टेबलस्पून, मीठ, कोथिंबीर, पाणी तीन वाट्या
कृती: 1)तोंडली स्वच्छ धुवा.
2) लांब तोंडली असतील तर देठ आणि टोक काढूनमधे दोन भाग करून चार चिरा द्या, लहान असतील तर देठ आणि टोक काढून फक्त चार चिरा द्या.
3) अर्ध पातेलं पाणी घेऊन त्यात चिरलेली तोंडली टाका.
4) लिंबाएवढी चिंच भिजत घाला.
5) कढईत तेल तापत ठेवा.
6) तेल तापलं की मोहोरी, जीरं, हिंग, हळद आणि लाल तिखट घालून फोडणी करा.
7) फोडणीत तोंडली टाकून दोन मिनिटं परता.
8)दोन वाट्या पाणी घालून झाकण ठेवा.
9) पाच मिनिटं छान वाफ येऊ द्या.
10) झाकण काढून तोंडली शिजलीत ना ते पहा.
11) आता त्यात मीठ, गूळ, चिंचेचा कोळ, गोडा मसाला, कांदा लसूण मसाला घाला.
12) दाण्याचं कूट आणि खोबरं घालून रस हवा असेल तसं पाणी घाला आणि उकळवा.
13) चव बघून जे हवं असेल ते वाढवा.
14) बारीक चिरून कोथिंबीर घालून पोळीबरोबर वाढा.
टीप: कांदा लसूण मसाला नसेल किंवा नको असेल तर लाल तिखट घालू शकता.