येडमी पुरी

 कुरकुरीत पुरी:

ही पुरी कुरकुरीत होते आणि दहा पंधरा दिवस सहज टिकते, उरली तर☺️ 

साहित्य: 

पारी साठी: पाऊण कप मैदा, पाव कप बारीक रवा, मीठ, हळद पाव टीस्पून, ओवा अर्धा टीस्पून, 2 टेबलस्पून तूप, पाणी

स्टफिंग साठी: बेसन एक कप, दोन टेबलस्पून तेल, एक टीस्पून आलं लसूण पेस्ट, अर्धा टीस्पून मिरची पेस्ट, तीळ 1 टीस्पून, जीरं पावडर अर्धा टीस्पून, हळद, कोथिंबीर मूठभर, मीठ, पाणी लागलं तर 

तेल तळणीसाठी

कृती:  रवा मैदा, हळद, मीठ, ओवा आणि तूप एकत्र करावे. लागेल तसं पाणी घेऊन घट्ट भिजवावे. अर्धा तास झाकून ठेवावे. बेसनात आलं लसूण मिरची पेस्ट, तीळ, जीरं पावडर , मीठ सगळं एकत्र करावं. कढल्यात तेल गरम करून ते बेसनात घालावं.  नीट मिक्स करून चव बघावी. बेसनाचे मिश्रण थोडं सणसणीत तिखट हवं. आता लागेल तसं थोडं थोडं पाणी घेऊन घट्ट भिजवावं. 

मैद्याच्या आणि बेसनाच्या सारख्या गोळ्या करून घ्याव्या. मैद्याची वाटी करून त्यात बेसनाची गोळी भरावी,

बंद करून पातळ पुरी लाटावी.

पुरीला काट्याने टोचे मारावेत. कढईत तेल तापत ठेवावे. मध्यम गॅसवर पुऱ्या तळाव्यात. गार झाल्यावर घट्ट झाकणाच्या डब्यात भरून ठेवाव्यात. 

छान कुरकुरीत होतात. 

टीप: तुम्हाला कुरकुरीत न करता लगेच खायला हव्या असतील तर टोचे न मारता तळा मस्त कचोरी सारख्या फुगतात.