मला मसूर डाळीची खिचडी जास्त आवडते. त्यात छोटे कांदे अख्खे घालून मस्त लागते.
साहित्य: पाऊण कप बासमती तुकडा तांदूळ, पाव कप मसूर डाळ, एक टीस्पून लाल तिखट, अर्धा टीस्पून गोडा मसाला, एक टेबलस्पून तेल, मीठ, अडीच कप पाणी, पाच सहा छोटे कांदे, हळद पाव टीस्पून, हिंग पाव टीस्पून, मोहोरी पाव टीस्पून
कृती: खिचडी करण्यापूर्वी अर्धा तास डाळ आणि तांदूळ एकत्र करून धुवावेत आणि चाळणीवर पाणी निथळत ठेवावेत. एका पातेल्यात अडीच कप पाणी घेऊन उकळत ठेवावे. कढईत तेल घेऊन तापत ठेवावे. तेल तापलं की मोहोरी, हिंग, हळद आणि लाल तिखट घालून फोडणी करावी. डाळ तांदूळ फोडणीत घालून छान परतावे. उकळलेले पाणी डाळ तांदळात ओतावे. गॅस मंद करावा. कांदे सोलून चार भाग करावे किंवा लहान असतील तर अख्खे ठेवावे. आता पाण्यात मीठ, गोड मसाला आणि कांदा घालून ढवळावे. पाण्याची चव बघावी. तिखट, मीठ व्यवस्थित लागत असेल तर पाच मिनिटं मध्यम आणि नंतर दहा मिनिटं मंद गॅसवर खिचडी ठेवावी. मसुरडाळ पटकन शिजते. नुसता शिजलेला कांदा मस्त वाटतो. जोडीला पापड कढी मग काय अहाहा!
कोणत्याही टिप्पण्‍या नाहीत:
टिप्पणी पोस्ट करा