कोबीची पचडी

साहित्यः
 एक मध्यम कोबीचा गड्डा, एक डाळींब लहान, एक लिंबू, ओल्या मिरच्या चार, कोथिंबीर, मीठ, साखर, दोन चमचे तेल, मोहोरी, हिंग, हळद.
कृती:
 कोबी धुवा आणि किसून किंवा फूडप्रोसेसरला आपल्या आवडीनुसार जाड बारीक करा. डाळींब सोलून घ्या. कोबीच्या किसावर लिंबू पिळा, एक चमचा साखर, मीठ घाला. व्यवस्थित एकत्र करा. तेल तापत ठेवा. मोहोरी पाव चमचा घाला. तडतडली की मिरच्यांचे तुकडे घाला. गॅस बंद करून हिंग हळद घाला. तयार फोडणी कोबीच्या मिश्रणावर घाला. नीट एकत्र करा. थोडी कोथिंबीर बारीक चिरून घाला. आता डाळींब दाणे घालून हलक्या हाताने मिसळा.
आमच्याकडे थोडी आंबट आवडते पचडी, मी दाण्याचे कूट घालत नाही.

आल्याची वडी

साहित्यः
आलं किसून एक वाटी, साखर एक वाटी, सायीसह दूध किंवा नुसते दूध अर्धी वाटी

कृती:
आलं स्वच्छ धुवावे. सालं काढून किसून घ्यावे.किसल्यावर मिक्सरला फिरवावे. आधी मिक्सरला फिरवले तर दोर रहातात. जेवढा आल्याचा कीस तेवढी साखर आणि त्याच्या निम्मे सायीसकट दूध घ्यावे. मिश्रण कढईत एकत्र करून मंद गॅसवर ढवळत रहावे.
गोळा होत आला की खाली उतरून घोटावे. ताटाला तूपाचा हात लावून त्यात मिश्रण थापावे. वड्या पाडाव्यात.
साखरेचे प्रमाण आल्याच्या तिखटपणावर वाढवावे. मी या वड्या थोड्या जास्त सुकवल्यात कारण ओल्या राहिल्या तर जास्त टिकत नाहीत. सायीसह दूध वापरल्याने आल्याचा तिखटपणा कमी येतो.

सालासह मुगाचे लाडू

साहित्यः
 दोन वाट्या सालासह हिरवे मूग, एक वाटी डाळं, एक वाटी पोहे, एक वाटी सुकं खोबरं, पिठीसखर दोन वाट्या, साजूक तूप एक वाटी, बेदाणे, वेलची पावडर.

कृती:
 मूग मंद आचेवर तांबूस भाजून घ्यावेत. भाजलेले मूग आणि डाळं एकत्र रवाळ दळून आणावं. सुकंखोबरं किसून भाजावे. कढईत पोहे घालून तेही भाजून घ्यावेत. आता कढईत तूप घ्यावे. तूप आधी थोडे वगळावे, लागेल तसे घ्यावे. तूपात भाजलेले मूगाचे पीठ घेऊन मंद आचेवर भाजावे. तांबूस खमंग भाजावे. गार करायला ठेवावे. भाजलेले पोहे मिक्सरला रवाळ दळावे. हे पीठ भाजलेल्या मूगाच्या पिठात मिसळावे. पिठीसाखर मिसळा. वेलची पावडर मिसळावी. गरज असेल तर साखरेचे प्रमाण वाढवावे. बेदाणे लावून लाडू वळावेत.

खरवसाची वडी

साहित्यः
पहिल्या दिवसाचा चीक दोन वाट्या, साखर दोन वाट्या, वेलची पावडर, दूध दोन वाट्या, केशर, बदामाचे काप.

कृती:
पहिल्या दिवसाचा चीक नुसताच शिट्टी न लावता १५ मिनिटे कुकरला वाफवून घ्यावा. गार झाला की भांड्यातून काढून किसावा. मी अर्धा चीक मिक्सरला फिरवून घेतला. जेवढा चीक असेल तेवढी साखर, चीक आणि दूध कढईत एकत्र करावे.

मध्यम आचेवर मिश्रण ढवळत रहावे. एकजीव झाले की वेलची पावडर आणि केशर मिसळावे.

ताटाला तूप लावावे. मिश्रणाचा गोळा होत आला की ताटात थापावे. गार झाल्यावर वड्या पाडाव्यात. हवे असल्यास बदामाचे काप सजावटीसाठी लावावे.

गोडीला कमी हवे असेल तर साखरेचे प्रमाण कमी घ्यावे. पूर्वी मुंबईकर मंडळींना लगेच चिकाचे दूध पाठवता येत नाही, म्हणून अशा वड्या करून खरवस पोहोचवला जायचा.

पोह्यांची उकड

पोहे हे आम्हा कोकणीमाणसांचा जीव की प्राण! कोणताही समारंभ पूर्ण होतच नाही पोह्यांशिवाय. जसे पोह्यांचे वेगवेगळे प्रकार होतात तशीच पोह्यांची उकडही मस्त लागते.
साहित्यः

 दोन वाट्या जाडे पोहे, दोन वाट्या ताक, दोन हिरव्या मिरच्या, कढिलिंबाची पाने, दोन चमचे तूप, एक चमचा जीरे, दहा बारा लसूण पाकळ्या, थोडं आलं किसून, मीठ, चिमुटभर हळद.
कृती:
 पोहे धुवावेत. धुतलेले पोहे आणि जरूरीनुसार ताक घालून मिक्सरवर फिरवून घ्या. अगदी गुळगुळीत करू नका. कढईत तूप घालून तापत ठेवा. त्यात जीरे, मिरचीचे तुकडे, सोललेल्या लसूण पाकळ्या घाला. लसूण चांगली तांबूस होऊद्या. तोपर्यंत तयार मिश्रणात मीठ, हळद मिसळून घ्या.लसूण तळली की कढीलिंबाची पाने घाला. आता तयार मिश्रण फोडणीत ओता. उरलेले ताक घाला. किसलेले आले घाला. गरजेनुसार पाणी घाला. ढवळून एक वाफ काढा.  गरमागरम उकडीवर साजूक तूप घालून खा.

नवलकोलची भाजी

साधारणपणे भात कापणीनंतर कोकणात लाल माठ, मुळा, नवलकोल, गावठी मिरच्या इत्यादी भाज्या लावल्या जातात. याच सिझनला त्या मिळतात. 

साहित्यः
 दोन जुड्या नवलकोल, फोडणीसाठी तेल, मोहरी, हिंग, हळद, दोन/तीन सुक्या लाल मिरच्या, तिखट, मीठ, गूळ, ओले खोबरे(ऐच्छीक).
कृती:
नवलकोलच्या कांद्यांवरील कोवळी पाने काढून धुऊन बारिक चिरावीत. कुकरला दोन शिट्या करून घ्याव्या. नवलकोलच्या कांद्याची साले काढून आपल्या आवडीप्रमाणे फोडी कराव्या. नेहमीप्रमाणे फोडणी करावी, फोडणीत सुक्या मिरच्या घालाव्या. त्यावर चिरलेल्या फोडी टाकून थोडे पाणी घालून शिजवून घ्याव्या. फोडी शिजल्या की चवीनुसार तिखट, मीठ, गूळ घालावे. शिजलेली पाने मिक्स करावीत. आवडत असल्यास थोडे ओले खोबरे घालावे. गरमागरम पोळीबरोबर भाजी फस्त करावी. या भाजीत फोडीबरोबर पानेही घातल्याने भाजी छान लागते

.

घाटलं!!

गौरी गणपतीला, शेतकापणी झाल्यावर मूगवणीला तसेच कोकणात बय्राच सणांना घाटलं करायची पध्द्त आहे. नेहमीचेच पदार्थ वापरून केलेला अजून एक चविष्ट पारंपारीक प्रकार!

साहित्यः
अर्धी वाटी तांदळाचा रवा, एक वाटी गूळ, एका नारळाचे ओले खोबरे (यातले अर्धी वाटी तसेच वापरायचे आहे आणि बाकीच्याचे दूध काढायचे आहे.), चार वाट्या पाणी, वेलची पावडर, सुंठ पावडर एक चमचा, हळद पाव चमचा, मीठ आणि केशर, एक चमचा तूप.

कृती:
ओल्या खोबय्रापैकी अर्धी वाटी बाजूला ठेवा. बाकी खोबय्राचे दूध काढून घ्या, साधारण चार वाट्या दूध निघेल. कढईत एक चमचा तूप घ्या. त्यात अर्धी वाटी रवा घालून मंद आचेवर तांबूस भाजून घ्या. एक वाटी गूळ, अर्धी वाटी ओले खोबरे, मीठ चवीपुरते, हळद, चार वाट्या पाणी हे सर्व एकत्र करा. उकळी काढा. गूळ विरघळला की भाजलेल्या रव्यात ओतून मंद आचेवर ठेवा. रवा शिजत आला की नारळाचे दूध, वेलची पावडर, सुंठ पावडर घालून ढवळा. वरून केशराच्या काड्या घाला.
तुम्हाला आवडेल त्याप्रमाणे सैल घट्ट करा. पण घाटलं चमच्याने खाण्या इतपत असते. तांदळाच्या पिठाच्या घावनांबरोबर घाटलं करतात.
माझी आजी प्राजक्ताच्या फुलांची देठं काढून ती सावलीत वाळवत असे. आणि त्या काड्याच केशर म्हणून वापरत असे.

गूळ नारळ पोहे : दिवाळी स्पेशल

कोकणात या दिवसात नविन भात तयार होते.  याभातापासून ताजे पोहे दिवाळीसाठी तयार केले जातात. भात आदल्यादिवशी भिजत घातले जाते. दुसय्रा दिवशी परडीत उसपून त्यावर आधण (गरम) पाणी ओतले जाते. मग हे भात भाजून त्यापासून पोहे कांडले जात. पूर्वी हे काम घरीच केले जाई. आता पोह्यांच्या गिरणीत होते.

दिवाळीच्या पहिल्या दिवशी नैवेद्याला गूळ नारळ पोहे हवेतच.
साहित्यः
 एक वाटी गावठी किंवा नेहमीचे जाडे पोहे, अर्धी वाटी ओले खोबरे, अर्धी वाटी गूळ, एक चमचा तूप, मीठ, वेलची पावडर. थोडे पाणी.

 कृती: प्रथम पोहे धुवावेत आणि चाळणीवर निथळत ठेवावेत. ओले खोबरे, गूळ आणि चवीला मीठ हे सर्व कढईत एकत्र करावे. पाव वाटी पाणी घालावे. मंद गॅसवर ठेवावे. गूळ विरघळला की धुतलेले पोहे घालून नीट मिसळावे. वेलची पावडर घालावी. चमचाभर तूप सोडावे. आणि एक वाफ येऊ द्यावी. गरमागरम चविष्ट पोहे केळीच्या पानावर घ्यावेत आणि वर तूपाची धार!!!! अहाहा!! थंडीच्या दिवसात मजा येते हे पोहे खायला. गूळ तुमच्या चवीनुसार कमी घेण्यास हरकत नाही.

कडबोळी: दिवाळी स्पेशल

पूर्वी अठराधान्यांची कडबोळी करत असत. अगदी अठरा नाही पण जी घरात उपलब्ध होती ती घेऊन केलेली खमंग कडबोळी!
साहित्यः
भाजणीसाठी: तांदूळ १ कि. ( मी गावठी वापरले), चणाडाळ अर्धा कि., उडीद पाव कि., एक वाटी पोहे, एक वाटी साबूदाणा, पाव वाटी तूरडाळ, पाव वाटी मसूरडाळ, पाव वाटी नाचणी, पाव वाटी मूग, पाव वाटी ज्वारी, अर्धी वाटी धने, पाव वाटी जीरे.
कडबोळ्यांसाठी: एक कि. भाजणी, पाऊण लि. पाणी, तेल १५०मिली, ओवा पाव वाटी, तिखट, मीठ, हळद, तेल तळणीसाठी.
कृती:
तांदूळ धुवावेत आणि सावलीत वाळवावेत. धुतलेले तांदूळ आणि बाकी सर्व साहित्य भाजून घ्यावे. खूप जास्त भाजू नये. उडीद भाजताना काळजी घ्यावी. भाजलेले सर्व साहित्य एकत्र करून बारीक दळून आणावे.

कडबोळी करायला घेताना एक कि. भाजणी मोजून घ्यावी, पाऊण लि. पाणी गरम करावे. ओवा मिक्सरला जरा फिरवून घ्यावा. पिठात ओवा, तिखट चार चमचे, हळद एक चमचा, मीठ मिसळावे. तेल चांगले गरम करून पिठावर घालावे. गरम पाणी घालावे. सर्व मिश्रण नीट एकत्र करून झाकून ठेवावे. अर्ध्या तासाने भाजणी चांगली मळून घ्यावी. मी फूडप्रोसेसरला फिरवून घेते. तयार पिठाचा गोळा घेऊन ताटाच्या पाठच्या बाजूला लांब वळावे. मग चकलीसारखे गुंडाळावे.

कढईत तेल चांगले तापवावे. तयार कडबोळी मध्यम गॅसवर छान कुरकुरीत तळावीत. लोण्याबरोबर फस्त करावीत. चकली तर वर्षभर असतेच. या दिवाळीला बघा कडबोळी करून!

मी कडबोळ्याच्या भाजणीत अख्खे हरभरे घालत नाही. हरभरे वापरले तर कडबोळी खाल्ल्यावर जळजळ होते, हा माझा अनुभव पण तुम्ही वापरून पहायला हरकत नाही.

गय्राच्या पिठाची आंबीलः खास उपासासाठी!

मे महिन्यात जेव्हा खूप फणस तयार होतात तेव्हा कच्च्या फणसाचे गरे सोलून बारीक चौकोनी फोडी करून वाळवले जातात. अगदी चांगले वाळले ही डब्यात भरून ठेवतात. या गय्रांचे पीठ केले जाते. हे पीठ चार पाच महिने चांगले टिकते. पावसातल्या उपासाला उपयोगी येते. अर्थात गय्राचा थोडा वास कळतो. या पिठाची थालिपीठे, आंबील असे प्रकार होतात.
साहित्यः
एक वाटी ताक, एक वाटी पाणी, मीठ, दोन चमचे गय्राचे पीठ, पाव चमचा जीरे, एक चमचा तूप, एक ओली मिरची, चिमुटभर साखर.


कृती:
एका भांड्यात ताक, पाणी, मीठ एकत्र करा. हवी असल्यास साखर घाला. आता यात दोन चमचे गय्राचे पीठ नीट मिसळून घ्या. गोळी राहता कामा नये. या मिश्रणाला तूपाची जिरे आणि मिरचीची खमंग फोडणी द्या. मंद गॅसवर उकळायला
ठेवा. ढवळत रहा. दाटपणा आला की गॅस बंद करा. गरमागरम प्या. नाचणीच्या आंबिली सारखीच लागते. कोथिंबीर वापरत असाल उपासाला तर वरून घाला.

घोसाळ्याची (पारोश्यांची) भजी

या मोसमात मुबलक प्रमाणात ही भाजी बाजारात दिसते. याची चिंचगुळाची भाजी, दह्यातले भरीत होतेच, पण भजी म्हणजे अहाहा!!!!

साहित्यः
दोन पारोशी, तीन वाट्या बेसन, अर्धी वाटी रवा, अर्धा चमचा ओवा, दोन चमचे तिखट, मीठ, तेल तळणीसाठी.

कृती:
पारोशी धुवून त्याच्या गोल चकत्या करून घ्या. एका भांड्यात पाणी घेऊन त्यात मीठ घाला. मीठाची चव आली पाहिजे पाण्याला. आता या पाण्यात चकत्या बुडवून ठेवा. एका खोलगट भांड्यात बेसन, रवा, तिखट, मीठ एकत्र करा. ओवा अगदी थोडा भरड करून घ्या. पिठात मिसळा.पाणी घाला. पिठाची चव बघून लागेल तसे तिखट, मीठ वाढवा. आता चकत्या चाळणीवर काढा. पाणी निघून जाऊ द्या. कढईत तेल तापत ठेवा. चकत्या पिठात बुडवून तळून घ्या. रव्यामुळे कुरकुरीत होतात भजी, सोडा किंवा तेल घालायची गरज नाही.

मस्त कुरकुरीत भजी तयार आहेत!!

आता वाट का पाहताय? करा सुरूवात!! पण जरा जपून, नाहीतर कांदाभजीसारखी खायला जाल आणि तोंड भाजेल!!
ही काही नविन पाकृ नव्हे....फक्त आठवण...केली नसाल तर लगेच करा!!

नागपूरची स्पेशल संत्रा बर्फी

नागपूरवारीत हमखास आणली जाणारी म्हणजे संत्रा बर्फी!! पण आम्हा कोकणातल्या मंडळींना नागपूर फारच लांब! त्यामुळे आता घरी केल्याशिवाय काही संत्राबर्फी मिळणार नाही.
साहित्यः

तीन वाट्या कोहाळा, दोन वाट्या खवा, तीन वाट्या साखर, अर्धा टीस्पून ऑरेंज इसेन्स, दोन वाट्या संत्र्याचा रस, संत्र्याची साल किसून दोन टेबलस्पून, वेलची पावडर.

कृती:
कोहाळा किसून घ्या. संत्र्याची साल किसताना त्याचा पांढरा भाग किसायचा नाही. फक्त वरची केशरी साल किसून घ्या. मला तीन मोठी संत्री लागली. संत्र्याचा रस काढून घ्या. आता सर्व साहित्य मोजून एकत्र करा. कोहाळ्याचा कीस, संत्राच्या सालीचा कीस, रस, साखर, इसेन्स, आणि चिमुटभर वेलची पावडर सर्व कढईत एकत्र करून मंद गॅसवर ठेवा. गोळा होऊ लागला की ताटाला तूप लावून थापा. तुम्हाला वडी, बर्फी जे हवे असेल त्याप्रमाणे कमी जास्त आटवा.

आता तुम्ही म्हणाल संत्रा बर्फीत कोहाळा का, तर मी जी प्रसिद्ध बर्फी खाल्ली त्यात घातलेले घटक बॉक्सवर वाचून मलातरी त्यात कोहाळा असतो असे वाटले. आणि मी प्रयोग केला तर परफेक्ट चव आली. बघा तुम्हीही प्रयोग करून!!

प्रतिसाद द्या

उपासाच्या सुरळीच्या वड्या

नवरात्र चालू आहे. नऊ दिवस उपास करणाय्रांसाठी थोडी वेगळी पण चविष्ट पाककृती घेऊन आलेय. उपास नसला तरी करून आस्वाद घ्यायला हरकत नाहीच!

साहित्यः

पाऊण वाटी शिंगाडा पीठ, पाव वाटी साबुदाणा पीठ, दोन वाट्या पाणी, एक वाटी ताक, मीठ, दोन ओल्या मिरच्या, अर्धा चमचा लाल तिखट, अर्धी वाटी बारीक चिरलेली कोथिंबीर, अर्धी वाटी ओलंखोबरं, दोन चमचे साजूक तूप, अर्धा चमचा जिरं.

कृती:
खोबरं खवून घ्यावं. कोथिंबीर धुवून बारीक चिरावी. मिरच्या वाटून घ्याव्या. खोबरं कोथिंबीर, मिरचीचं वाटप आणि मीठ एकत्र करावं. दोन वाट्या पाणी आणि ताक नॉनस्टीक पॅनमध्ये एकत्र करावं. चवीनुसार मीठ, लाल तिखट घालावं. आता त्यात शिंगाडापीठ आणि साबुदाणा पीठ घालून नीट मिसळावं. गोळी होता कामा नये.

आता मंद गॅसवर मिश्रण सतत ढवळत राहावं.

 दोन ताटाना तूपाचा हात लावून घ्यावा. मिश्रण शिजत आलं की घट्ट होत जातं. पिठाचा रंग बदलतो. आता मिश्रण उलथ्याच्या सहाय्याने भराभर ताटावर पसरावे. त्यावर खोबरं कोथिंबीर घालावी. तूप जिय्राची फोडणी करावी. या मिश्राणावर पसरावी. हा फोटो फोडणी घालण्या पूर्वीचा आहे.

आता उभ्या रेषा मारून घ्याव्या. अर्ध्यापर्यंत गुंडाळावे.

अश्या पध्दतीने सर्व वड्या गुंडाळून घ्याव्या. मस्त डीश तयार आहे. आता मनसोक्त उपास करा!!!

घरगुती मसाला सुपारी (सुपारी विरहीत)

 आता नवरात्र म्हटले की रोज गोड खाणं होणार आणि गोड खाल्ल्यावर मुखशुध्दी हवीच! माझ्या एका मैत्रिणीने पद्मावतिने दिलेल्या रेसिपीत माझ्या आवडीनुसार बदल करून केलेली ही घरगुती मसाला सुपारी!!
 साहित्यः
 तीन वाट्या बडिशेप, अर्धी वाटी पांढरे तीळ, अर्धी वाटी ओवा, २५ ग्रॅम जेष्ठ्मध, २५ लवंगा, २५ वेलची नग, सुके खोबरे एक वाटी, मीठ चवीनुसार, पिठीसाखर पाव वाटी, धना डाळ ५० ग्रॅम

कृती:
सुके खोबरे किसून घ्यावे. बडिशेप, ओवा, लवंगा, वेलची, सुके खोबरे, तीळ हे सर्व वेगवेगळे मंद गॅसवर खमंग भाजून घ्यावे. तीळ तसेच ठेवावे. बडिशेप, ओवा, वेलची, लवंगा आणि किसून भाजलेले सुके खोबरे आणि २५ ग्रॅम धना डाळ सर्व मिक्सरवर बारीक करून घ्यावे. आता बारीक केलेले सर्व एकत्र करावे. चवीनुसार मीठ, पिठीसाखर घालावी. जेष्ठमध पावडर मिसळावी. शेवटी भाजलेले तीळ अख्खेच मिसळावे. २५ ग्रॅम धना डाळ अख्खी मिसळावी. पिठीसाखर चवीनुसार कमीजास्त करावी. तयार आहे आपली झटपट मसाला सुपारी! आता भरा बकाणे!!

नाचणीचे डोसे

साहित्य: 
   दोन वाट्या नाचणीचे पीठ, पाऊण वाटी तांदुळाचे पीठ, पाव वाटी डाळीचे पीठ, दोन तीन हिरव्या मिरच्या बारीक करून, कोथिंबीर बारीक चिरून, दोन वाट्या ताक, मीठ, पाणी.
कृती:
  नाचणीचे पीठ, तांदुळाचे पीठ, डाळीचे पीठ एकत्र करावे. मिक्सरला मिरच्या बारीक करून घ्याव्या. कोथिंबीर धुवून बारीक चिरावी. मिरचीचे वाटप, कोथिंबीर, मीठ पिठात मिसळावे. ताक घालावे. गरजेनुसार पाणी घालावे डोश्याइतपत पीठ असावे. तवा तापवून तेलावर डोसे घालावे. गॅस मध्यम ठेवावा. नाचणीमुळे पटकन रंग बदललेला कळत नाही.
 नारळाच्या चटणी बरोबर सर्व्ह करावे

आमसुलाची चटणी

खरंतर आमसुलाची चटणी अतिशय चविष्ट असते, ती इतरवेळी का करत नाहीत कोण जाणे. कदाचित सारखे खीर वडे खाणाय्रा मंडळीना त्रास होऊ नये म्हणून आमसुलाची चटणी याचवेळी केली जात असावी .ज्याच्याशिवाय श्राध्द पक्ष पूर्ण होत नाही अशी ही आमसुलाची चटणी!

साहित्यः
अर्धी वाटी आमसुले, पाव वाटी गूळ, पाच सहा ओल्यामिरच्या, पाव वाटी ओले खोबरे, एक चमचा जीरे, मीठ.
कृती:
आदल्यादिवशी रात्री आमसुले पाण्यात भिजत घालावीत. विसरल्यास सकाळी गरम पाण्यात घालावीत. मिरच्या धुवून तुकडे करावेत. आमसुले (पाण्याशिवाय), मिरच्यांचे तुकडे, ओले खोबरे, गूळ, जीरे आणि चवीनुसार मीठ एकत्र करून छान बारीक वाटावे. गरज वाटल्यास आमसुलाचे पाणी वाटताना घालावे. आमसुले व्यवस्थित आंबट असतील तर गूळ जास्त लागू शकतो.
ही चटणी एकदम मस्त लागते. उरलेले आमसुले भिजवलेले पाणी आमटीत वापरावे.

चिबडाची दह्यातली कोशिंबिर

चिबडाची दह्यातली कोशिंबिर

पावसाळ्यात कोकणात ठरावीक फळभाज्या मोठ्या प्रमाणात येतात. पडवळ, दुधी, काकडी, भेंडे, भोपळा, शिराळी, पारोशी त्यापैकीच एक चिबूड! ही काही फार वेगळी पाकृ नाहीय. पण ज्यांनी चिबूड पाहिला नसेल त्यांच्यासाठी! चिबूड नुसता मीठ साखर लावून पण चांगला लागतो.

हा चिरल्यावर आतून असा दिसतो.

साहित्यः
एक मध्यम आकाराचा चिबूड, पाव लिटर दुधाचे घट्ट दही, पाच सहा ओल्या मिरच्या, मीठ, चार पाच चमचे साखर, दोन चमचे तूप, हिंग , जीरे.

कृती:
बाहेरची साल पूर्ण पिवळी झालेला चिबूड घ्यावा. बिया आणि साल काढून फोडी करून घ्याव्या. दह्यात मीठ, साखर घालून सारखे करावे. तूप गरम करून जीरे, मिरची तुकडे, हिंग घालून फोडणी करावी. जेवायला बसताना आयत्यावेळी सगळे एकत्र करावे. चिबडाच्या फोडीत मीठ, साखर घातल्यास पाणी सुटते, म्हणून आयत्यावेळी सारखी करावी.
याला एक प्रकारचा वास असतो, काहींना तो आवडत नाही. पण ज्यांना आवडतो ते वाट बघत असतात, कधी मिळतोय चिबूड याची! या कोशिंबीरीला साखरेची पुढे चव चांगली वाटते. फोडणी नको असेल तर मिरच्या वाटून घालाव्या.

विलायती फणसाची भाजी

साहित्यः

  दोन मध्यम आकाराचे विलायती फणस(हे नेहमीच्या फणसासारखेच काटेरी आणि आतून गरे असलेले फणस असतात) अर्धी वाटी तेल, चार पाच आमसुले, दोन चमचे गूळ, चवीनुसार मीठ, सात आठ सांडग्या मिरच्या, दोन तीन सुक्या मिरच्या, दहा बारा मेथी दाणे, फोडणीचे साहित्य, एक वाटी ओले खोबरे.
 कृती:
 फणसाची साल आणि मधला कडक भाग काढून चिरून घ्यावा. चिरलेला फणस आमसुले घालून कुकरला वाफवून घ्यावा.  तेल गरम करून सांडग्या मिरच्या तळून घ्याव्या. उरलेल्या तेलाची मोहोरी, हिंग, मेथीदाणे, हस्ळद, सुक्या मिरच्या घालून फोडणी करावी. चिरलेल्या फणसातली आमसुले काढून फणस फोडणीत घालावा. त्यात गूळ, मीठ, ओले खोबरे घालावे. लागल्यास थोडे लाल तिखट घालावे. तळलेल्या मिरच्या चुरून त्यातला थोडा चुरा भाजीत घालावा, छान एकत्र करून पाच मिनिटे वाफ काढावी. भाजी वाढताना वरून फोडणी आणि चुरलेली मिरची घालून खावी.

y

आंबा मोदक

.

साहित्यः
आटवलेला आंब्याचा रस एक वाटी,
साखर दीड वाटी
वेलची पावडर,
पाणी,
मोदकाचा साचा
.

.
कृती:
दीड वाटी साखर कढईत घ्या. त्यात एक वाटी पाणी घाला. मध्यम गॅसवर ठेवून ढवळत रहा. साखरेचा गोळीबंद पाक करायचा आहे. एका वाटीत अर्धी वाटी पाणी घ्या. पाकाचा थेंब पाण्यात टाकून पाहा. पाकाची घट्ट गोळी झाली की गॅस बंद करा.
आता या पाकात चिमूटभर वेलची पावडर घाला आणि लगेच रसाचा गोळा मिसळा. खाली उतरून घोटत राहा.
चांगला गोळा झाला की मोदकाच्या साच्यात घालून मोदक करा. याच्या वड्या करायच्या असतील तर गोळा झाल्यावर ताटाला तूप लावून त्यात गोळा थापा आणि वड्या पाडा.
आमरसाचा सुंदर स्वाद आणि रंग येतो या मोदकांना!
.