खोबऱ्याची वडी/ नारळी पाक:

खोबऱ्याची वडी/ नारळी पाक:

साहित्य:
ओलं खोबरं दोन वाट्या, दूध एक वाटी, साखर दीड वाटी, वेलची पावडर पाव चमचा, तूप दोन चमचे

कृती:

ओलं खोबरं आणि दूध एकत्र करून मिक्सरमध्ये बारीक करून घ्यावे. कढईत एक चमचा तूप घालून वाटलेलं खोबरं आणि साखर एकत्र करून मंद गॅसवर ढवळत रहावे. घट्ट होऊ लागले की उरलेलं एक चमचा तूप आणि वेलची पावडर घालून परतत रहावे. ताटाला तुपाचा हात लावावा. गोळा  झाला की खाली उतरून घोटत रहावे. घट्ट झाला की ताटावर थापून आपल्या आवडीप्रमाणे वड्या कापाव्यात.
मी सजावटीसाठी केशर काड्या वापरल्यात.

उपासाची खांडवी:

उपासाची खांडवी:

साहित्य: वरी तांदूळ एक वाटी, ओलं खोबरं अर्धी वाटी, गूळ एक वाटी, पाणी तीन वाट्या, केशर सिरप एक चमचा, वेलची पावडर पाव चमचा, तूप तीन चमचे, आलं किसून एक चमचा, मीठ
कृती: वरी तांदूळ मिक्सरमध्ये थोडे फिरवून रवा करून घ्या. कढईत दोन चमचे तूप घ्या. त्यात वरीचा रवा तांबूस भाजून घ्या. एका पातेलीत गूळ, पाणी, मीठ चवीला, ओलं खोबरं, आल्याचा कीस एकत्र करा. त्यात केशर सिरप आणि वेलची वावडर घालून गूळ विरघळेपर्यंत उकळा. उकळलेले मिश्रण भाजलेल्या रव्यात घालून ढवळा. मंद गॅसवर दहा मिनिटं वाफ येऊ द्या. थाळ्याला तूप लावून घ्या. दहा मिनिटांनी मिश्रण ढवळून परत झाकण ठेवा. रवा पूर्ण शिजला आणि मिश्रण घट्ट झाले की थाळ्यात थापून घ्या. ओलं खोबरं थापताना वर पसरून सजवा.

प्रसादाचा शिरा:

प्रसादाचा शिरा: 

          काही काही पदार्थ पाहिले तरी ते करणारं माणूस आधी समोर येतं... तसा हा प्रसादाचा शिरा! लग्नाआधी पूजेसाठी करताना आमच्या घरी सोवळ्यात करायचा आणि तोही नऊवारी नेसून त्यामुळे मी त्या प्रांतात गेलेच नाही.
       लग्न झाल्यावर पूजेचा प्रसाद करणं हा एक सोहळा असतो हे मी सासुबाईंची तयारी पाहून अनुभवलं. त्याची तयारी त्या आदल्या दिवशीच करतात. सव्वा किलो रवा मोजून घ्यायचा, तो मंद आचेवर तांबूस भाजायचा. बेदाणे काड्या काढून ठेवायचे. काजूगर सोलून पाकळ्या करून ठेवायच्या. बदाम काप करून ठेवायचे. सव्वा की साखर, सव्वा की साजूक तूप वेगवेगळ्या डब्यात मोजून तयार ठेवायचं. सकाळी आंघोळ करून आल्यावर खाली शेगडी घेऊन त्यावर भली मोठी कढई ठेवायची... बसायला तसाच ऐसपैस चौरंग! रव्याच्या तिप्पट दूध पाणी घ्यायचं. दूध तापवून झालं की दोन भाग साय न काढता दूध आणि एक भाग पाणी एका बाजूला गरम करायचं. दुसऱ्या बाजूला कढईत सगळं तूप घेऊन त्यात भाजलेला रवा परत परतायला ठेवायचा. सव्वा केळं काप करून या रव्यावर तुपात तळायचे. बेदाणे पाण्यात धुवून तेही तुपात घालायचे. काजूगर, बदाम काप सगळेच पाठोपाठ तुपात पोहायला लागायचे. आता त्यात चिमूटभर मीठ घालायचं. आणि गॅस मंद ठेवून तयार दूध पाणी सावकाश ओतायचं.. हे करताना रवा फसफसू लागतो... अंगावर उडू शकतो. आता साखर मिसळायची. वेलची पावडर सढळहस्ते मिसळून नीट खालपासून हलवायचा, दुधात खलून केशर काड्या शिऱ्यात मिसळायच्या. आता झाकण ठेवून एक वाफ काढायची आणि झाकण काढून तूप सुटेपर्यंत मंद गॅसवर परतत रहायचं! 
       असा काही मस्त सुगंध पसरतो घरभर...अहाहा! हे सगळं त्या इतकं तन्मयतेने करत असतात की ती गोडी शिऱ्यात उतरतेच!
अजूनही मी कितीही पदार्थ बनवत असले तरीही प्रसादाचा शिरा मी केलेला नाही. वयाच्या ७४व्या वर्षीही तितक्याच उत्साहाने त्या प्रसाद करतात. आज नवरात्रातल्या नैवेद्यासाठी त्यांची कॉपी करायचा मी केलेला छोटासा प्रयत्न... तूप जरा कमीच झालंय माझं... कोकणस्थीपणा आडवा येतो दुसरं काय?😊

आमरस भात

आजचा नैवेद्य: आमरस भात
साहित्य: एक वाटी तांदूळ, एक वाटी आमरस( मी टीन मधला वापरला), पाऊण वाटी साखर, पाव चमचा वेलची पावडर, काजूगर , बेदाणे, पाणी , मीठ, अर्धं लिंबू, लवंगा पाच सहा, तूप  चार चमचे, केशर सिरप एक चमचा
कृती: 1) तांदूळ धुवून चाळणीवर निथळत ठेवावेत.
2) कढईत तीन चमचे तूप तापत ठेवावे.
3) तूप तापलं की मंद गॅसवर लवंगा टाकाव्यात.
4) त्यावर तांदूळ घालून छान परतावेत.
5) परतलेल्या तांदळात दोन वाट्या पाणी, चवीला मीठ आणि एक चमचा केशर सिरप घालून भात शिजवून घ्यावा.
6) शिजलेला भात परातीत मोकळा करून ठेवावा.
7) पाणी गरम करून त्यात काजूगर भिजत घालावेत.
8) कढईत साखर, रस एकत्र करून  मंद गॅसवर ढवळत रहावे.
9) साखर विरघळली की तयार भात, बेदाणे, काजूगर, वेलची पावडर, लिंबूरस हे सर्व मिक्स करावे.
10) मंद गॅसवर पाच मिनिटं झाकण ठेवून वाफ काढावी.
11) वाफ आली की उरलेलं एक चमचा तूप बाजूने सोडावे आणि पाच मिनिटं ठेवावे.
12) भात मोकळा दिसू लागला की गॅस बंद करावा.
13) भाताला आंब्याचा स्वाद आणि रंग मस्त येतो.
बघा करून!

आजचा प्रसाद: लाल भोपळ्याचा हलवा

साहित्य: अर्धा की भोपळा, 200 ग्रॅम खवा, पाऊण वाटी साखर, वेलची पावडर अर्धा चमचा, केशर काड्या, बदाम काप, बेदाणे, तूप तीन चमचे.

कृती:
 भोपळा किसून घ्या. कढईत तूप तापत ठेवा. त्यात भोपळ्याचा कीस परता. पाच मिनिटं परतून झाल्यावर साखर मिक्स करा. खवा घाला. वेलची पावडर, बेदाणे घाला. दहा मिनिटं मंद गॅसवर परतत रहा. तूप सुटू लागलं की गॅस बंद करा. बदाम कापांनी सजवा. भोपळ्याचा हलवा उपासाला चालतो.
आजच्या रंगाचा पण झाला प्रसाद! भोपळ्याचा वास मात्र कळतो हलव्यात... बघा करून आवडतोय का!

😊

झटपट भरली वांगी

साहित्य: वांगी अर्धा की, दोन कांदे, दोन टेबलस्पून तेल, एक टेबलस्पून चिंचेचा कोळ, एक टेबलस्पून गूळ, एक टीस्पून गोडा मसाला, एक टीस्पून कांदा लसूण मसाला, ओलं खोबरे दोन टेबलस्पून, शेंगदाणे कूट दोन टेबलस्पून, मीठ, मोहोरी पाव टीस्पून, हळद पाव टीस्पून, एक टीस्पून लाल तिखट.
कृती: 1) वांगी धुवून देठ कापून त्याला अधिक चिन्हासारखा कट द्यावा. चिरलेली वांगी पाण्यात ठेवावी.
2) कांदे सोलून बारीक चिरावे.
3)नारळ खवून घ्यावा.
4) चिंचेचा कोळ काढून घ्यावा.
5)कढईत तेल तापत ठेवा.
6)तेल तापलं की मोहोरी घाला.
7) मोहोरी तडतडली की कांदा घालून परतावा.
8) कांदा परतल्यावर त्यात हळद, लाल तिखट घालून परतावे.
9) आता चिरलेली वांगी घालून परतावे.
10) त्यात तीन वाट्या पाणी घालावे. थोडं मीठ घालून झाकण ठेवावे.
11) पाच मिनिटांत झाकण काढून वांगी शिजली का पहावं.
12) वांगी शिजली की त्यात गूळ, कोळ, गोडा मसाला, कांदा लसूण मसाला, दाण्याचं कूट, ओलं खोबरं आणि थोडं मीठ घालून ढवळावे.
13) छान उकळी येऊ द्यावी. चव बघून काही हवं असल्यास वाढवावे.
भरली वांगी एकेक वांगं भरण्यासाठी वेळ लागतो त्यापेक्षा अशी केली तर झटपट होतात.

फोडणीचा ब्रेड

साहित्य: स्लाइस ब्रेड एक 300 ग्रॅम, दोन ओल्या मिरच्या, पाव वाटी तेल, मोहोरी पाव चमच्यापेक्षा कमी, हळद पाव चमचा, मीठ, साखर, कोथिंबीर, कढीलिंब (ऐच्छिक), लाल तिखट लागल्यास, दोन कांदे
कृती:
१) स्लाइस ब्रेडचे छोटे तुकडे करून घ्या.
2) कांदे चिरून घ्या.
3)कढईत तेल तापवा.
४)मोहोरी घाला.
५)मिरचीचे तुकडे घाला.
६) कांदा घालून परता.
७) कांदा परतला की हळद घाला.
८) परतून  ब्रेड चे तुकडे मिक्स करून मंद गॅसवर परता.
९) चवीनुसार मीठ, थोडी साखर घाला.
१०) बारीक चिरलेली कोथिंबीर घालून सर्व्ह करा.

मुखशुद्धी

साहित्य: बडीशेप एक वाटी, तीळ पाव वाटी, आळशी किंवा जवस पाव वाटी, धनाडाळ पाव वाटी, मीठ, ओवा दोन चमचे
कृती: एका वाटीत पाव वाटी पाणी घ्या. त्यात एक चमचा मीठ विरघळवुन घ्या. कढई मध्यम गॅसवर तापत ठेवा. त्यात तीळ, ओवा, आळशी वेगवेगळं गरम करून घ्या. बाजूला ठेवा. बडीशेप कढईत घ्या. मंद गॅसवर तयार केलेलं मिठाचं पाणी शिंपडत भाजून घ्या. सगळं पाणी लागणार नाही. मिठाची चव आली की पुरे. कुरकुरीत झाली की गॅस बंद करा. धनाडाळ, भाजलेल्या सर्व वस्तू एकत्र करून घट्ट झाकणाच्या बरणीत भरून ठेवा.

श्रीखंड

साहित्य: चक्का 500 ग्रॅम, साखर 500 ग्रॅम, वेलची पावडर अर्धा टीस्पून, जायफळ पावडर अर्धा टीस्पून, मीठ चवीला, केशर काड्या, बदाम काप.


कृती: तयार चक्का मोजून तेवढी साखर घ्यावी. साखरेचे प्रमाण चक्क्याच्या आंबटपणावर कमी जास्त होईल.  चक्का, साखर, मीठ , वेलची पावडर आणि जायफळ पावडर एकत्र करून पुरण यंत्रातून किंवा चाळणी तुन काढावे. आता त्यात थोडया गरम करून केशर काड्या चुरून मिक्स कराव्या. बदाम कापानी सजवावे. यात रंग वापरू नका. पांढऱ्या श्रीखंडात मधेच येणारा केशराचा रंग छान दिसतो.

मेथी पराठे

साहित्य

सा: एक जुडी मेथी, पाच वाट्या कणिक, अर्धी वाटी तांदूळ पीठ, अर्धी वाटी बेसन, सातआठ लसूण पाकळ्या, लाल तिखट एक चमचा, हळद अर्धा चमचा, मीठ, तेल पाव वाटी, पाणी

कृती: मेथी निवडून धुवून चिरावी. एक चमचा तेलावर कढईत परतावी. सगळी पीठं, तिखट, मीठ, हळद, लसूण पेस्ट करून एकत्र करावं. परतलेली मेथी घालावी. तेल घालून नीट मिक्स करावे. लागेल तसे पाणी घेऊन पीठ मळावे. अर्धा तास झाकून ठेवावे. पोळीप्रमाणे लाटून पराठे करावेत, नारळाच्या चटणी बरोबर सर्व्ह करावेत. या पिठाच्या पुऱ्या सुद्धा करू शकता.