कॉर्न चीज बॉल्स

कॉर्न चीज बॉल्स:

साहित्य: मक्याचे दाणे एका कणसाचे साधारणपणे 100 ग्रॅम, एक बटाटा, अर्धा चमचा आलं लसूण पेस्ट, एक कांदा, मूठभर कोथिंबीर, मीठ, तिखट अर्धा चमचा, कॉर्न फ्लोअर, चीज क्यूब, ब्रेड स्लाईस चार पाच, पाणी, तेल

कृती: मक्याचे दाणे दहा मिनिटं वाफवून घ्या.  चाळणीवर काढा. बटाटा शिजवून घ्या. कांदा चिरा. कोथिंबीर धुवून चिरून घ्या. आलं लसूण पेस्ट करून घ्या. दाणे कोरडेच थोडे अख्खे वगळून बाकीचे मिक्सरला भरड वाटून घ्या. एका थाळ्यात काढा. बटाटा सोलून कुस्करून घ्या. बारीक केलेल्या दाण्यांत बटाटा, कांदा, कोथिंबीर, आलं लसूण पेस्ट, तिखट,मीठ घालून नीट मिक्स करा. ब्रेडचा चुरा करून घ्या.

एका वाटीत चार चमचे कॉर्न फ्लोअर घ्या. त्यात चवीला मीठ आणि थोडं पाणी घालून दाटसर पेस्ट बनवा. चिजचे चौकोनी तुकडे करा. तयार मिश्रण सैल वाटलं तर थोडा ब्रेडचा चुरा मिसळा. थोडं मिश्रण घेऊन गोळा करा. गोळा करत असतानाच त्यात चीज तुकडा ठेवा.  तयार बॉल आधी कॉर्नच्या पेस्टमध्ये घोळवा मग ब्रेडच्या चुऱ्यात घोळवून घ्या. तेल तापत ठेवा. तयार बॉल्स तळून घ्या. सॉस सोबत सर्व्ह करा.