सुरळीच्या वड्या

सुरळीच्या वड्या:

कधी कधी खूप सारे पदार्थ करताना एखादा राहून जातो. सुरळीच्या वड्या माझी जाऊ रोहिणी छान करते त्यामुळे मी आपली हाताखाली लुडबुड.. पुर्णपणे एकटीने आज पहिल्यांदा केल्या.
साहित्य: एक वाटी बेसन(चणाडाळीचं पीठ), दोन वाट्या पाणी, एक वाटी ताक, मीठ, दोन ओल्या मिरच्या, अर्धा चमचा लाल तिखट, अर्धी वाटी बारीक चिरलेली कोथिंबीर, अर्धी वाटी ओलंखोबरं, दोन चमचे तेल, अर्धा चमचा मोहोरी, हिंग
कृती: खोबरं खवून घ्यावं. कोथिंबीर धुवून बारीक चिरावी. मिरच्या वाटून घ्याव्या. खोबरं कोथिंबीर, मिरचीचं वाटप आणि मीठ एकत्र करावं. दोन वाट्या पाणी आणि ताक नॉनस्टीक पॅनमध्ये एकत्र करावं. चवीनुसार मीठ, लाल तिखट, हळद, हिंग घालावं. आता बेसन घालून नीट मिसळावं. गोळी होता कामा नये.

आता मंद गॅसवर मिश्रण सतत ढवळत राहावं. दोन ताटाना तेलाचा हात लावून घ्यावा. मिश्रण शिजत आलं की घट्ट होत जातं. पिठाचा रंग बदलतो.

आता उलथ्याच्या सहाय्याने भराभर ताटावर पसरावे. त्यावर खोबरं कोथिंबीर घालावी.
आता उभ्या रेषा मारून घ्याव्या. अर्ध्यापर्यंत गुंडाळावे.
अश्या पध्दतीने सर्व वड्या गुंडाळून घ्याव्या. मस्त डीश तयार आहे.
वरून तेलाची मोहोरी हिंगाची फोडणी द्यावी.