बीटच्या देठांची कढी

बीटच्या देठांची कढी:

 बीट घ्यायला गेले तर छान पाल्यासह बीट मिळाले. पाल्याची भाजी केली आणि देठ वेगळे ठेवले.
साहित्य: बीटचे देठ एक वाटी शिजवून, दोन वाट्या ताक, अर्धी वाटी ओलं खोबरं, चार पानं कढीलिंब, दोन लसूण पाकळ्या, दोन ओल्या मिरच्या, दोन वाट्या पाणी, दोन टीस्पून डाळीचं पीठ, दोन टीस्पून तूप, चिमूटभर जीरं, हिंग, साखर दोन टीस्पून, मीठ.

कृती: बीटचे देठ धुवून सोलून घ्या. बारीक चिरा. मी वाफवून घेतले, तसेच घेतले तरी चालेल. लसूण सोलून घ्या. मिरची धुवून तुकडे करा. मिरची तिखट असेल तर कमी घ्या.
मिक्सरमध्ये बीटचे देठ, खोबरं, मिरच्या, लसूण एकत्र फिरवा. एक वाटी पाणी घालून परत फिरवा. पातेल्यात गाळण्याने गाळा.परत एक वाटी पाणी घालून चोथा फिरवून गाळा. दोन चमचे साखर, मीठ, कढीलिंब पाने, ताक सर्व गाळलेल्या मिश्रणात घालून ढवळा. थोडं मिश्रण एका वाटीत घेऊन डाळीचं पीठ मिक्स करा. गुठळ्या राहू देऊ नका. तुपाची जीरं आणि थोडी हिंग पावडर घालून फोडणी करा. जेवताना गरम करा. मस्त रंग येतो.😊
✍🏻 मिनल सरदेशपांडे