रताळ्याचा कीस

साहित्य:
 अर्धा की रताळी, एक वाटी किंवा आवडीनुसार शेंगदाण्याचे कूट, दोन चमचे साखर, पाव वाटी तूप, चार ओल्या मिरच्या, मीठ, अर्धा चमचा जीरे, पाव वाटी ओलं खोबरं ऐच्छिक

कृती:
 रताळी स्वच्छ धुऊन घ्यावीत. सालं काढून घ्यावीत. स्वच्छ असेल तर सालं ठेवली तरी चालतील. पातेल्यात अर्धी पातेली पाणी घ्यावे.रताळी किसून कीस पाण्यात टाकावा. मिरच्यांचे तुकडे करून घ्यावे. कीस पाण्यातून काढून घट्ट पिळून घ्यावा. त्यात दाण्याचे कूट, साखर, मीठ घालून नीट मिक्स करावे. कीस परतल्यावर आळतो, त्या अंदाजाने मीठ घालावे. कढईत तूप तापत ठेवावे. तापलं की जीरं, जीरं तडतडलं की मिरच्यांचे तुकडे घालावेत. मिरच्या परतल्या की तयार मिश्रण घालून ढवळावे. झाकण ठेवून छान वाफ काढावी. दहा पंधरा मिनिटात कीस तयार होतो, त्याचा रंग बदलतो. ओलं खोबरं वरून घालू शकता किंवा आधीच मिक्स करू शकता. चव बघून लागल्यास मीठ घालावे.